Hengill Ultra

Hengill er stærsta utanvegar hlaup Íslands og ein fallegasta hlaupaleið landsins.

Hlaupið er eitthvað fyrir alla, allt frá léttri 5 km leið upp í 160 km. Byrjunarreitur allra vegalenda er í hjarta Hveragerðis. 

Styttri vegalengdirnar eru í kringum Hveragerði og upp að Hamrinum sem er gríðarlega fallegur hraunhamar yfir bænum. 25 km vegalengdin er upp Reykjadalinn upp að Ölkelduhnjúk og í kringum hann. 50 km hlauparar hlaupa hinsvegar áfram inn að Hengli, yfir fjallgarðinn, niður Sleggjubeinsskarð og þaðan til baka. Þeir sem hlaupa 106 km fara þá leið tvisvar og þrisvar fyrir 160 km leiðina. Útsýnið frá Hengli er algjörlega einstakt og er þessi hlaupaleið ein sú fallegasta sem hægt er að finna á Íslandi.

Esja Ultra

Mt. Esja ultra er alvöru fjallahlaup sem haldið var í tíunda sinn 19. júní s.l. Esjan, sem er eitt af einkennum höfuðborgarsvæðisins, er 914 metrar á hæð og býður upp á einstakt útsýni yfir höfuðborgarsvæðið. Hægt er að hlaupa mismunandi vegalengdir í hlaupinu en þær eru 2 km ævintýrahlaup fyrir krakka, 3 km upp að steini, 14 km Mt. Esja Ultra II og 45 km Mt. Esja Maraþon. Það er því eitthvað í boði fyrir alla fjölskylduna.

Hlaupahátíð Vestfjarða

Hlaupahátíðin á Vestfjörðum var haldin 15. - 18. júlí sl og samanstendur hún af ýmsum keppnisgreinum. Hlaup, sjósund og hjól er allt hluti af hátíðinni. Einnig er keppt í þríþraut sem samanstendur af 500 m sjósundi, 55 km Vestugötuhjólreiðum og 24 km Vestugötuhlaupi. Vesturgatan er vegarslóði á milli Arnarfjarðar og Dýrafjarðar.

Hlaupahátíðin er mikil fjölskylduhátíð en á meðan keppninni stóð var einnig í boði fyrir krakka að keppa í skemmtihjólreiðum og skemmtiskokki. Einnig var hægt að fara í jóga og fara á tónleika í garðinum hjá Láru á Þingeyri.

Laugavegshlaupið

Laugavegshlaupið er 55 kmlangt utanvegahlaup sem haldið var í 25. sinn þann 17. júlí s.l.. Hlaupið er fyrir mjög vana hlaupara 18 ára og eldri.

Laugavegurinn tengir saman Landmannalaugar og Þórsmörk á sunnanverðu hálendi Íslands, tvær náttúruperlur. Staðsetningin gerir það að verkum að Laugavegurinn er einungis þjónustaður í nokkrar vikur á ári.

Í hugum margra hlaupara er Laugavegshlaupið skemmtilegasta hlaupið á Íslandi. Á þessari krefjandi leið verða hlauparar vitni að ótrúlegri náttúrufegurð. Göngugarpar eru venjulega 4 daga á leið sinni um Laugaveginn. Undirlendið er fjölbreytt þar sem hlaupið er á sandi og möl, í grasi og snjó, á ís, yfir ár og læki.

Snæfellshlaupið

Snæfellsjökulshlaupið var haldið í ellefta skiptið 26. júní s.l.. Hlaupaleiðin er um 22 km og er langstærsti hluti hlaupsins er malarvegur. Fyrstu 8 km þarf að hlaupa upp í móti í c.a. 700 metra hæð. Síðan tekur hlaupaleiðin að lækka þar til komið er til Ólafsvíkur. Hlauparar eiga von á að þurfa kljást við snjó og drullu frá 1 km til 7 km af leiðinni, en fer það eftir því hvað veturinn var snjóþungur. Hlauparar fá á leiðinni að upplifa einstaka náttúrufegurð og að öllu ógleymdu allri þeirri orku sem Snæfellsjökull býr yfir.