Laufey Lín Jónsdóttir, sem kemur fram undir nafninu Laufey, heillaðist ung af djasstónlist úr plötusafni föður síns, ekki síst upptökum með Ellu Fitzgerald og Chet Baker. Hún lítur mjög upp til fiðluleikarans móður sinnar og lærði sjálf á selló og píanó, en er í dag orðin heimsþekkt söngkona, lagahöfundur og flytjandi aðeins 23 ára að aldri.

„Ég er mikill aðdáandi djasstónlistar og mér er mikið í mun að kynna djassinn fyrir nýjum áheyrendum, nýrri kynslóð.“

Laufey samdi fyrsta lagið sitt sextán ára gömul. Hún samdi næsta lag ekki fyrr en fjórum árum síðar, en það var lagið „Street by Street,“ fyrsta lagið sem hún gaf út og fleytti henni upp vinsældalistana, á síður Rolling Stone og upp á svið hjá Jimmy Kimmel.

Laufey er hálfkínversk en ólst jöfnum höndum upp í Reykjavík og Washington. Í dag býr hún í Los Angeles. Þar líður henni einna best á ströndinni; hún segir að sjávarloftið minni hana á heimahagana jafnvel þótt Kyrrahafsgolan í Malibu sé vissulega svolítið ólík rokinu við Íslandsstrendur.

Fyrsta breiðskífa Laufeyjar, Everything I Know About Love (sem hún segir sjálf að vísi til þess hvað hún viti afskaplega lítið um ástina!) er nýkomin út. Eftir tvenna stórtónleika með Sinfóníuhljómsveit Íslands kemur Laufey fram á Iceland Airwaves hátíðinni áður en hún leggur upp í uppselt tónleikaferðalag um Evrópu.