Markmið verkefnisins er að þróa nýja aðferð við vinnslu fatnaðar á sjálfbæran hátt sem hefur fullnýtingu að leiðarljósi. Verkefnið er á frumstigi og lofa fyrstu frumgerðir þess mjög góðu. Sá árangur hefur leitt til þess að fyrirtækið 66° Norður hefur ákveðið að ganga til liðs við Valdísi og stefnir á að framleiða regnkápur undir merki fyrirtækisins þegar þróun þess verður komin lengra. Á HönnunarMars 2022 verða efnisprufur til sýnis til að gefa forsmekk af því sem koma skal í samstarfinu í framtíðinni. Það er trú hönnuðar verkefnisins að mikilvægt sé að kanna nýjar leiðir til að framkvæma hluti sem hingað til hafa verið unnir samkvæmt rótgrónum hefðum og eykur verkefnið þá breidd sem nú þegar stendur til boða í aðferðafræði á fatamarkaði. Nýstárlegt efnisval og vinnsluaðferðir stuðla að fullnýtingu sem gefur einstakt útlit.