Nýja flaggskipaverslun okkar í Kaupmannahöfn er staðsett í rými sem áður hýsti verslunina Storm, sem hefur síðustu áratugi verið ein helsta tísku- og lífsstílsverslun Kaupmannahafnar.

Hönnun verslunarinnar sækir innblástur í kyrrð og einfaldleika íslensks landslags og færir náttúru Íslands til Kaupmannahafnar.

Innréttingarnar eru í mjúkum gráum tónum, með áherslu á náttúruleg efni og látlausa áferð. Verslunin sækir innblástur í íslenska náttúru og þar má meðal annars finna vegg úr hraunhellum og íslenskt berg.

Mátunarklefarnir á neðri hæðinni eru bein skírskotun í jökla og jökulhella. Verslunarrýmið er málað með málningu frá íslenska fyrirtækinu Dýpi, sem framleiðir málningu úr kalkþörungum úr Arnarfirði á Vestfjörðum.

„Þegar Rasmus Storm, eigandi Storm, ákvað að láta staðar numið með verslunina eftir 32 ár í rekstri vildi hann finna réttan aðila sem gæti haldið uppi merkjum þessa skemmtilega verslunarhúsnæðis. Samtal hófst á milli okkar og úr varð að 66°Norður tók við húsnæðinu en það varð líka til gott vinasamband á milli okkar og unnin var lítil samstarfslína sem seld verður í versluninni sem Rasmus hannaði á Íslandi með hönnunarteyminu okkar.“

- Helgi Rúnar Óskarsson, forstjóri 66°Norður.