Frá Vestfjörðum á Paralympics

Arna Sigríður verður fyrsta íslenska konan til að keppa bæði á vetrar- og sumarmótum Paralympics.

Arna Sigríður er 35 ára íþróttakona og íþróttafræðingur frá Ísafirði. Hún verður fyrsta íslenska konan til að keppa bæði á vetrar- og sumarmótum Paralympics. Líf hennar tók óvænta stefnu þegar hún var 16 ára og lenti í slysi á skíðaæfingu í Noregi sem leiddi til mænuskaða. Það sem áður var sjálfsagt varð allt í einu ómögulegt. En þrátt fyrir áfallið fann hún nýjar leiðir.

„Þegar ég var 16 ára og hlaut mænuskaða í skíðaæfingaferð í Noregi hefði mig aldrei getað dreymt um að núna yrði ég fyrsta íslenska konan til að keppa bæði á vetrar- og sumar Paralympics.“

Upphafið í skíðabrekkunum

Arna ólst upp í fjölskyldu þar sem útivist og skíði voru fastur hluti af daglegu lífi. Hún steig fyrst á skíði tveggja ára gömul og fljótlega fór hún að æfa svigskíði og keppa í mótum innanlands. Hún tók þátt í Andrésarleikunum og bikarmótum víða um land, og það varð fljótt ljóst að hún hafði sérstaka ástríðu fyrir skíðunum.

„Ég er fædd og uppalin á Ísafirði og var mjög virk í íþróttum frá ungum aldri. Ég byrjaði á skíðum tveggja ára gömul með fjölskyldunni og um átta ára aldur fór ég að æfa svigskíði.“

Slysið í æfingarbúðum í Noregi var mikið áfall, en með stuðningi fjölskyldu og vina lærði hún að byggja líf sitt upp á nýtt - frá því að nota hjólastól til að finna styrk og sjálfstæði í daglegu lífi.

„Ég var ótrúlega heppin að hafa frábært fólk í kringum mig í endurhæfingunni. Stuðningurinn gerði ótrúlega mikið fyrir mig, en ég þurfti að endurskoða allt í lífinu - læra allt upp á nýtt, hvernig á að lifa með mænuskaða og nota hjólastól. Fyrir einhvern sem er vanur að vera mjög virkur var þetta mikið áfall og stór áskorun að byrja upp á nýtt.“

Handhjólreiðar eftir slysið

Eftir slysið fann Arna Sigríður handahjólreiðar sem urðu hennar leið til að komast aftur út í náttúruna og finna frelsi í hreyfingu. Handahjólið leyfði henni að styrkja líkamann, byggja úthald og endurheimta tilfinninguna fyrir sjálfstæði - eitthvað sem hún hafði ekki upplifað eftir slysið.

„Þetta var fyrsta tækifærið þar sem ég fann aftur tilfinninguna fyrir frelsi á eigin krafti, að ferðast hratt, upplifa hraðann og samspilið við náttúruna, alveg eins og ég hafði áður gert fyrir slys.“

Íþróttaferillinn hennar Örnu byrjaði aðalega eftir slysið. Hún hóf mikla styrktarþjálfun til að verða sterkari og auðvelda sér daglegt líf, að koma sér inn í bíl, fram úr rúminu og sinna verkefnum sem áður voru sjálfsögð. Hún naut þess mikið og byrjaði smátt að hjóla á handahjóli heima á Ísafirði til að komast út og finna útrás í útiverunni.

Arna hefur keppt á mörgum mótum á alþjóðavettvangi, þar á meðal heimsbikarmótum, heimsmeistaramótum og á Paralympics 2021 í Tokyo. Með hverri æfingu hefur hún aukið bæði styrk og úthald, og handahjólið hefur orðið hennar aðalverkfæri til útiveru og hreyfingar á sumrin.

„Handahjólið gaf mér aftur tilfinninguna fyrir frelsi, hraða og tengsl við náttúruna - það sama frelsi sem skíðin gáfu mér fyrir slys.“

Frelsið á gönguskíðum

Undanfarin ár hefur Arna helgað sig einnig gönguskíðum, þar sem úthald og hraði sameinast svipað og í handahjólreiðum. Hún keppir í bæði sprett- og millivegalengdum og æfir sex daga vikunnar á skíðum, auk styrktarþjálfunar þrisvar í viku.

„Það sem mér finnst mest spennandi við gönguskíðin og handahjólið er að báðar krefjast úthalds. Ég get hjólað á sumrin og skíðað á veturna og notið útiverunnar við allar árstíðir.“

Markmið hennar er að safna keppnisreynslu og njóta þess ómetanlega að vera á Paralympics, stærsta sviði íþróttafólks með hreyfihömlun.

„Fyrirmyndirnar mínar eru æfingarfélagarnir mínir - það gefur mér ótrúlega mikið að kynnast öðrum með svipaða hreyfihömlun og sjá hvað fólk er tilbúið að leggja á sig, jafnvel eftir erfið áföll.“

Að finna sína eigin leið

Arna vill hvetja alla sem glíma við áskoranir að finna sína eigin leið til hreyfingar. Hún trúir því að það að komast út í náttúruna, upplifa frelsið og njóta hreyfingar geti styrkt bæði líkama og sál. Fyrir hana er lykillinn að finna réttu útivistina fyrir sig og þau hjálpartæki sem þarf til að komast af stað.

„Það sem drífur mig áfram er að fá vindinn í andlitið, komast hratt áfram og finna frelsið sem ég upplifi þegar ég er á skíðum. Það besta sem þú getur gert fyrir líkama og sál er að komast út í náttúruna.“

Saga Örnu Sigríðar er meira en saga íþróttamanns. Hún sýnir hvernig hægt er að yfirstíga hindranir, finna sína eigin leið og njóta útiveru og hreyfingar á eigin forsendum. 66°Norður óskar Örnu góðs gengis á Paralympics og í öllum þeim verkefnum sem hún tekur sér fyrir hendur.

99.900 kr