Með Erm er afgangsefni úr dúnúlpum og jökkum frá 66°Norður gefið framhaldslíf sem einstök hönnunarvara í formi stóla og kolla. Hönnuðirnir skapa framsæknar hönnunarvörur með því að nýta ermar af ónýtanlegum dúnúlpum sem eru saumaðar saman í langa rana. Ranarnir, sem fá einstakt útlit sitt eftir hvaða úlpur eru notaðar, eru klæddir utan um sveigð stálrör og fær hver stólgrind eina langa ermi. Við hönnun stólanna er notast við flæðandi, hlykkjóttar línur og er hver stólgrind án samskeyta. 

Verkefnið sýnir að hægt er að fara nýjar leiðir í samnýtingu ýmissa afgansvara þvert á vöruflokka þar sem föt eru endurnýtt sem hluti af húsgögnum. Með þessu er opnað á samtal um hvernig hægt sé að framlengja líftíma með því að hoppa á milli efnis heima. Getur úlpa verið stóll? Og eftir það, getur hún kannski verið eitthvað allt annað?

Erm er skýrt og afgerandi dæmi um hvernig hægt sé að gefa hlutum framhaldslíf aftur og aftur, á þverfaglegan hátt. Verkefnið er unnið með 66°Norður og kjólasaumsnema, Nínu Guðrúnu Guðlaugsdóttur.