No Ice stuttermabolurinn varpar ljósi á það hvernig hlýnun jarðar er að breyta íslensku landslagi. Við finnum vel hvernig jöklarnir okkar eru að gefa eftir með hækkandi hitastigi. Við hjá 66°Norður viljum vekja athygli á þessu máli og leggja okkar af mörkum til að sporna gegn þessari þróun.

Síðan 2019 höfum við ekki tekið þátt í Svörtum föstudegi. Þess í stað höfum við lagt fram 25% af sölu okkar í vefverslun til að fjármagna íslensk umhverfissamtök sem öll eiga það sameiginlegt að vernda náttúruna okkar.

Föstudaginn 28. nóvember stóðum við í sjöunda skiptið fyrir föstudegi fyrir jöklana. Þann dag runnu 25% af allri sölu í vefverslun til Jöklarannsóknafélags Íslands. Í vikunni fyrir þann dag runnu einnig 25% af allri sölu á No Ice stuttermabolnum í vefverslun til Jöklarannsóknafélags Íslands.

Jöklarannsóknafélag Íslands var stofnað árið 1950, en markmið þess er að stuðla að jöklarannsóknum og fræðslu um jöklana okkar og nágrenni. Samvinna vísindamanna og sjálfboðaliða er grundvöllur félagsins sem hefur skilað miklum árangri og eflt jöklarannsóknir hér á landi enn frekar. Félagið hefur stundað mælingar á hopi og framskriði jökulsporða allt frá upphafi.